धरान / २६औं अन्तराष्ट्रिय आमन्त्रण बुढासुब्बा गोल्डकपको तयारी पुरा भएको छ । मंगलबार आयोजक धरान फुटबल क्लबले पत्रकार सम्मेलन गरी तयारी पुरा भएको जानकारी दिएको हो । माघ २२ गते देखि २६औं बुढासुब्बा गोल्डकपको सम्पुर्ण तयारी पुरा भएको जानकारी दिएको छ । क्लबका अध्यक्ष प्रताप तामाङले भने,‘सबै तयारी पुरा भइसक्यो । अब शुरु गर्न मात्र बाँकी छ । भोलीदेखि टिमहरु आउन थाल्छन् ।’
अध्यक्ष तामाङका अनुसार भोली बुधबार भुटान र भारतको टिम आइपुग्नेछ । प्रतियोगिता सञ्चालनको लागि जिल्ला प्रशासन कार्यालय सुनसरीबाट केही सर्तहरुसहित स्वीकृति पाएको पनि उनले बताए । निर्वाचनको कारण प्रशासनले कार्यक्रमहरु आयोजनामा कडाई गरेको बेला बिशेष अनुरोधमा प्रतियोगिताको लागि स्वीकृति पाएको उनले खुलाए ।
बिशेष परिस्थितिकै कारण प्रतियोगिताको उद्घाटन सामान्य हुने आयोजक क्लबले जनाएको छ । तर, उद्घाटन खेलअघि दुवै टिमका खेलाडीहरु मैदान प्रवेश गर्दा अटिज्म भएका बच्चालाई साथमा लिएर प्रवेश गर्ने पनि अध्यक्ष तामाङले जानकारी दिए । उनले भने,‘अटिज्मबारे सचेतना जगाउनको लागि र अटिज्म भएका बच्चाहरुलाई माया गरौं भन्ने सन्देश दिनको लागि हो ।’
प्रतियोगितामा साविक विजेता एनआरटि, उपविजेता चर्च ब्वाइजसहित सातदोबाटो युथग क्लब, नेपाल पुलिस क्लब, पोखराको लालीगुराँस एशोसिएशन, झापा ११, जर्जियन क्लब भारत, रोयल थिम्पु भुटान र आयोजक धरान फुटबल क्लब गरि १० वटा टिम सहभागी हुने आयोजकले जनाएको छ । यसपाली आयोजकको टिममा धरानको मात्रै खेलाडीहरु सहभागी गराइने पनि अध्यक्ष तामाङको भनाई थियो । ‘हामीलाई उपाधि जित्नै पर्ने दबाब छ । पाँच पटक फाइनल खेल्दा पनि उपाधिविहिन छौं । यसपाली २ महिनादेखि खेलाडीहरुलाई प्रशिक्षण गराइरहेका छौं,’ उनले भने
प्रतियोगिताको विजेता टिमले उपाधि ट्रफीसहित नगद १० लाख र उपविजेताले ५ लाख पाउनेछ । प्रतियोगिताको सर्वोत्कृष्ट खेलाडीले डियो स्कुटर पाउने पनि आयोजकले जनाएको छ । फाइनल खेल्ने दुई टिमबाट उत्कृष्ट खेलाडी छनौट गरेर उक्त पुरस्कार दिइने पनि उनले खुलाए । प्रतियोगिताको प्रिक्वार्टर खेलहरुको टिकट दर शुरुमा एक सय रुपैया,सेमीफाइनलको २ सय र फाइनलको ४ सय रुपैया राखिएको अध्यक्ष तामाङले जानकारी दिए । विद्यार्थीलाई ५० र सेमीफाइनलको सय रुपैया टिकट लाग्नेछ भने फाइनलमा छुट नभएको अध्यक्ष तामाङले बताए ।
प्रतियोगिताको उद्घाटनमा धरान उपमहानगरपिलकाका कार्यवाहक नगर प्रमुख अइन्द्रबिक्रम बेघा प्रमुख अतिथि रहनेछ । उद्घाटन खेल आयोजक धरान फुटबल क्लब र जर्जियन क्लब भारत बीच हुने आयोजकले पत्रकार सम्मेलनमा जाकारी दिएकेछ ।
